Luns. 26.09.2022

O grupo do Partido Popular no Concello de Oroso, a través do seu portavoz, Alexander Doval, cualificou esta mañá de “decepcionante” o resultado do proxecto levado cabo polo executivo local, que está na súa recta final, para a reurbanización da rúa Ourense, e que contou cun orzamento total de 100.000 euros.

 

Os populares consideran que a actuación, enmarcada no Plan de Obras e Servizos da Deputación do 2018, debería ter en conta a necesidade de incluír a construción dalgunha zona verde, así como a colación dalgún banco. “Queremos poñer o foco tamén no choque estético que se produce entre a rúa do Camiño Real –por onde transcorre o Camiño Inglés- e unha zona empedrada con zona verde e zona de descanso, coa sinxeleza extrema da reurbanización da rua Ourense”, criticou Doval.

 

Así mesmo, o portavoz dos populares aproveitou para denunciar que a intersección entre a rúa Ourense e ou Camiño Real deixa unha nova beirarrúa que conta cun espazo moi xusto para o paso de coches, unha circunstancia, dixo Doval, que obriga, por exemplo, aos vehículos grandes a invadir o espazo reservado para peóns.

Bótanse en falta tamén o soterramento dos colectores de lixo. Somos conscientes de que habería que modificar os pregos do servizo de recollida de lixo, pero todos os pobos e cidades, cando fan reurbanizacións de rúas, tenden a isto, a soterrar os contedores, en Oroso están todos en superficie”, subliñou Doval.

Por último, os populares aproveitaron a ocasión para comentar que, se ben é certo que se perderon algunhas prazas de aparcamento coa nova rúa, bótase en n falta unha praza de aparcamento para persoas con mobilidade reducida, máis tendo en conta, dixo Doval, que hai un centro de fisioterapia nesta rúa.

 

 

comentarios
Entrando na páxina solicitada Saltar publicidade