O Bloque Nacionalista Galego de Arzúa fíxose hoxe eco do anuncio por parte do banco Sabadell de pechar a oficina que ten nesta localidade ante o ERE anunciado pola entidade.
Desde o BNG alertan do recorte de servizos que “é só a punta do iceberg do desmantelamento de servizos que se está a producir en moitos concellos rurais coma o noso” explicou Xoán Xesús Carril, portavoz municipal do BNG en Arzúa.
Desde o BNG explican que “de consumarse o peche desta sucursal será moita a veciñanza afectada, moita dela de idade avanzada, que se verá obrigada a cambiar todas as súas contas e xestións financeiras a outro banco” dixo Carril.
Por este motivo, o portavoz municipal do BNG chama ao goberno municipal arzuán a “saír da pasividade na que están instalados e defender Arzúa” sinalan. Insta ao goberno arzuán “a pór os servizos do concello ao dispor das veciñas e veciños que o precisen á hora de ter que realizar todos eses trámites” explicou Carril.
Denuncian a complicidade do goberno de Feixóo co desmantelamento dos concellos rurais
As e os nacionalistas apuntan ao goberno da Xunta de Galiza como “cómplice co desmantelamento dos concellos rurais” explicaron.
“Resulta escandaloso e perverso que dende o goberno da Xunta non só non fan fronte a esta situación, senón que son cómplices do desmantelamento, convocando axudas millonarias destinadas a premiar o peche de oficinas, subvencionando caixeiros automáticos con cartos públicos en locais cedidos polos concellos” sinalou o portavoz municipal do BNG.
Desde o BNG anuncian que levarán esta cuestión tamén até o Parlamento galego, “para denunciar tamén alí este novo atropelo a Arzúa perpetrado polo PP desde a Xunta de Galiza” concluíu o portavoz municipal.
