O PP de Santiago cataloga a situación do contrato de limpeza e conserxería nos Centros de Educación Infantil e Primaria da cidade como “precaria”, segundo denunciou o concelleiro Borja Rubio. O edil criticou que o contrato está “caducado e sen licitar, deixando as necesidades da comunidade educativa totalmente abandonadas”.
Así pois, reclamou ao goberno local que leve a cabo accións inmediatas para mellorar as “pésimas condicións destas instalacións”, incluíndo a recuperación do persoal de limpeza en horario de mañá, como se fixo durante a crise sanitaria da COVID-19, ademais de reclamar melloras nas condicións laborais dos traballadores. Finalmente, o edil lembrou que esta medida foi presentada polo PP santiagués no pleno e aprobada por unanimidade, polo que o BNG “non pode seguir dándolle as costas”.
